Служба новомученикам и исповедникам Орехово-Зуевским

Текст Службы новомученикам и исповедникам Орехово-Зуевским, одобренный богослужебной комиссией Московской епархии. Составитель Быков Петр Иванович.

Месяца ноемвриа в 6-й день

Собора новомучеников и исповедников Орехово-Зуевских

На велицей вечерни

На Господи, воззвах: стихиры глас 6.

Подобен: Все отложше:

Все отложивше житейское попечение,/ во дни гонений на Церковь Русскую/ стезею страданий мужески, новомученицы, шествовасте/ и, мучений лютых и смерти не убоявшеся,/ Христа даже до крове исповедасте./ Темже, вратами правды и терпения/ в радость Господа своего вшедше,/ молите Отечеству нашему в мире сохранитися/ и спастися душам нашим.

Всю возложивше на Подвигоположника надежду/ и Его благодатию укрепляеми, мученицы,/ веры ради подвизастеся твердо,/ темже изгнания и поношения,/ клеветы и на смерть осуждение,/ мужественне за Христа претерпесте./ Ныне же, в радости Небесней пребывающе,/ молите всех Владыку,/ землю Русскую в Православии сохранити/ и спасти души наша.

Всю положивше живота цену/ за сокровище неиждиваемое и Живот Вечный,/ страстотерпцы прехвальнии,/ куплею страдальческою и кровьми мучений/ Царствие Небесное обретосте,/ идеже со всеми святыми/ молите Всеблагаго Бога/ в Православии нас утвердити/ и спасти души наша.

Ины стихиры, глас 2:

Нищетою вольною обогатився/ и смирением богатство веры стяжав,/ жизнь твою страданьми за Христа увенчал еси,/ священномучениче отче Никито,/ за овцы словесныя злострадания прием,/ святительства дар и сокровище души некрадомо соблюл еси./ Ныне же, яко венценосец священный,/ Престолу Божию предстоя,/ моли спастися душам нашим.

Гуслицкия обители всекрасное прозябение,/ преподобномученицы Иоасафе, Петре и Серафиме,/ воздержанием сугубо души очистивше,/ венцем страданий украсилися есте./ Темже ныне, яко преподобных сонаследницы/ и мучеников славы сопричастницы,/ молите Увенчавшаго вас Христа/ спастися душам нашим.

Егда врата адова отверзошася на Церковь Русскую,/ тогда вы, священномученицы преславнии,/ Иоанне, Николае, Василие и Сергие,/ богомудрии Павле, Василие и Александре,/ страданьми паству во единстве сохранили есте,/ заповеди евангельския исполнивше./ Ныне же, предстояще Пастыреначальнику Христу,/ молите спастися душам нашим.

Яко воини Христови добропобеднии,/ священномученицы Николае, Василие и Иоанне,/ добльственнии Василие, Сергие и мучениче Димитрие,/ во дни гонения за веру Христову,/ образ исповедания твердаго и упования непостыднаго/ богодарованней пастве явили есте./ Темже и нам помозите, святии,/ веру Православную сохранити/ и спастися душам нашим.

Слава, глас 4:

Яко доблий кормчий, святителю Никито,/ с богоизбранною дружиною новомученик Орехово-Зуевских,/ паству твою мужественне ко пристанищу спасения путеводил еси,/ душу и тело твое не пощадив./ Помози и нам, страстотерпче,/ моря житейскаго пучину безбедно преплыти/ и Царствия Небеснаго достигнути.

И ныне, Богородичен: Иже Тебе ради:

Вход. Прокимен дне. Чтения три.

Деяний святых апостол чтение (глава 4):

В тыя дни собрашася во Иерусалим князи, старцы, книжницы/ и елицы беша от рода архиерейска./ И, поставльше Петра и Иоанна посреде, вопрошаху:/ коею силою или коим именем исцелиста хромаго./ Петр, исполнився Духа Свята, рече:/ князи людстии и старцы Израилевы,/ аще мы днесь истязуеми есмы о благодеянии человека немощна,/ о чесом сей спасеся,/ разумно буди всем вам и всем людем Израилевым,/ яко во имя Иисуса Христа Назореа,/ Его же вы распясте,/ Егоже Бог воскреси от мертвых,/ о сем Сей стоит пред вами здрав:/ Сей есть Камень, укоренный от вас зиждущих,/ бывый во главу угла,/ и несть ни о единем же инем спасения:/ несть бо иного Имени под небесем, даннаго в человецех,/ о немже подобает спастися нам./ Видяще же Петрово дерзновение и Иоанново и разумевше,/ яко человека некнижна еста и проста, дивляхуся,/ знаху же их, яко со Иисусом беста:/ видяще же изцелевшаго человека с нима стояща,/ ничтоже имяху противу рещи./ Повелевше же има вон из сонмища изыти,/ стязахуся друг со другом, глаголюще:/ что сотворим человекома сима;/ яко убо нарочитое знамение бысть има,/ всем живущим во Иерусалиме яве,/ и не можем отврещися:/ но да не более прострется в людех,/ прещением да запретим има ктому не глаголати о имени сем ни единому от человек./ И призваше их,/ заповедаша има отнюдь не провещавати ниже учити о имени Иисусове./ Петр же и Иоанн отвещавша к ним реста:/ аще праведно есть пред Богом/ вас послушати паче, нежели Бога, судите:/ не можем бо мы, яже видехом и слышахом, не глаголати./ Они же призапрещше има, пустиша я,/ ничтоже обретше како мучити их, людий ради,/ яко вси прославляху Бога о бывшем:/ лет бо бяше множае четыредесяти человек той,/ на немже бысть чудо сие изцеления./ Отпущена же бывша приидоста ко своим и возвестиста,/ елика к нима архиерее и старцы реша./ Они же, слышавше, единодушно воздвигоша глас к Богу и рекоша:/ Владыко, Ты, Боже, сотворивый небо и землю и море и вся, яже в них,/ иже Духом Святым усты отца нашего Давида отрока Твоего рекл еси:/ вскую шаташася языцы, и людие поучишася тщетным;/ предсташа царие земстии,/ и князи собрашася вкупе на Господа и на Христа Его./ Собрашася бо воистинну во граде сем на святаго отрока Твоего Иисуса,/ Егоже помазал еси,/ Ирод же и Понтийский Пилат с языки и людьми израилевыми,/ сотворити, елика рука Твоя и совет Твой преднарече быти:/ и ныне, Господи, призри на прещения их/ и даждь рабом Твоим со всяким дерзновением глаголати слово Твое,/ внегда руку Твою прострети Ти во изцеления,/ и знамением и чудесем бывати Именем святым отрока Твоего Иисуса./ И помолившимся им, подвижеся место, идеже бяху собрани,/ и исполнишася вси Духа Свята/ и глаголаху слово Божие со дерзновением.

К Тимофею послания святаго апостола Павла чтение (2 Тим., глава 4):

Чадо Тимофее,/ засвидетельствую убо аз пред Богом и Господем нашим Иисус Христом,/ хотящим судити живым и мертвым в явлении Его и царствии Его:/ проповедуй слово,/ настой благовременне и безвременне,/ обличи, запрети, умоли со всяким долготерпением и учением./ Будет бо время, егда здраваго учения не послушают,/ но по своих похотех изберут себе учители, чешеми слухом,/ и от истины слух отвратят, и к баснем уклонятся./ Ты же трезвися о всем, злопостражди,/ дело сотвори благовестника,/ служение твое известно сотвори./ Аз бо уже жрен бываю,/ и время моего отшествия наста./ Подвигом добрым подвизахся,/ течение скончах, веру соблюдох./ Прочее убо соблюдается мне венец правды,/ егоже воздаст ми Господь в день он, Праведный Судия,/ не токмо же мне, но и всем возлюбившим явление Его.

Ко евреем послания святаго апостола Павла чтение (глава 11):

Братие,/ святии верою победиша царствия,/ содеяша правду, получиша обетования,/ заградиша уста львов,/ угасиша силу огненную,/ избегоша острея меча,/ возмогоша от немощи,/ быша крепцы во бранех,/ обратиша в бегство полки чуждих./ Прияша жены от воскресения мертвых своих./ Инии же избиени быша, не приемше избавления,/ да лучшее воскресение улучат./ Друзии же руганием и ранами искушение прияша,/ еще же и узами и темницею./ Камением побиени быша,/ претрени быша, искушени быша,/ убийством меча умроша,/ проидоша в милотех, и в козиях кожах,/ лишени, скорбяще, озлоблени./ Ихже не бе достоин весь мир,/ в пустынях скитающеся и в горах и в вертепах и в пропастех земных./ И сии вси, послушествовани бывше верою, не прияша обетования./ Богу лучшее что о нас предзревшу,/ да не без нас совершенство приимут.

На литии стихиры, глас 5:

Жребий мученический,/ яко дар благодатный, приемше, святии,/ за Христа пострадали есте,/ Иже вас, яко свидетели верныя,/ в Небесныя обители всели/ и победными венцы украси./ Его же молите, новомученицы,/ и нам дерзновение в вере стяжати/ и Царствия Небеснаго достигнути.

Истиннаго Бога свидетелие вернии,/ новомученицы Орехово-Зуевстии,/ во страданиих своих Воскресение Христово исповедали есте./ Ныне же, Пасхи вечныя наслаждающеся,/ молите Всемилостиваго Владыку/ в Православии нам утвердитися/ и Царствия Небеснаго достигнути.

Слава и ныне, Богородичен, глас тойже:

Богородицу и Матерь Света/ присно в песнех величающе,/ ныне с собором новомучеников и исповедников/ гласы умиленными воспеваем,/ Едину Чистую и Благословенную,/ даровавшую нам неистощимое Сокровище,/ Христа, Бога нашего.

На стиховне стихиры, глас 2.

Подобен: Егда от Древа:

Егда прииде время испытания веры вашея,/ тогда делом явили есте, новомученицы,/ како любы Христова всяк страх изгоняет/ и смерти державу побеждает,/ како путь тесный широту райскую отверзает./ Онем же путем, всеблаженнии,/ путеводите и нас ко спасению.

Стих: Честна пред Господем/ смерть преподобных Его.

Егда законопреступнии людие/ руки своя на вы возложиша/ и, яко злодеев, на смерть осудиша,/ тогда, страстотерпцы прехвальнии,/ агнчим незлобием/ и смирением крестным/ ярость безбожных посрамили есте/ и от смерти к Жизни вечней,/ мученическим закланием востекли есте.

Стих: Воззваша праведнии/ и Господь услыша их.

Егда от рук беззаконных/ немилостивно убиени бысте, новомученицы,/ и безчестно в ров земный ввержени,/ тогда исповедницы всеобщаго Воскресения/ и Жизни Вечныя явистеся/ и, яко зерна пшеничная,/ в земли посеявшеся/ и плод сторичный принесше,/ в Царствии Небеснем процвели есте.

Слава, глас 4:

Приидите, вси вернии,/ священномученика Никиту восхвалим,/ архипастыря пречуднаго земли Московския,/ мученика неодолима и исповедника тверда,/ с ним же и лик победоносный прославим,/ новомученики и исповедники Орехово-Зуевския./ Сии бо, страданьми веру истинную исповедавше,/ славу праведных и воздаяния мучеников унаследоваша./ Тех молитвами, Христе Боже, спаси души наша.

И ныне, Богородичен, глас тойже:

Призри на моления Твоих раб, Всенепорочная,/ и всякия скорби избави землю Русскую,/ дом Твой нареченную и кровьми новомученик освященную,/ да не постыдимся, Владычице Державная, Тя призывающии,/ Ты бо еси православных Помощь,/ Радость и Покров и Спасение душ наших.

По Ныне отпущаеши: тропарь новомучеников дважды. И Богородице, Дево: единожды.

Тропарь, глас 5:

Православныя веры хранителие/ и твердии Христови исповедницы,/ новомученицы Орехово-Зуевстии,/ страданьми землю нашу освятившии/ и мрак безбожия в ней разсеявшии,/ ныне же Престолу Божию предстоящии/ и сладости райския наслаждающиися,/ молите Христа Бога/ мир Отечеству даровати/ и душам нашим велию милость.

На утрени

На Бог Господь: тропарь новомyчеников, дважды. Слава, и ныне, Богородичен, глас 5: Радуйся Двере Господня:

По 1-м стихословии седален, глас 4:

Страданий поприще победно прошедше, мученицы,/ истинную веру твердо исповедали есте/ и, лесть вражию обличивше,/ к Небесному ликостоянию боголепно востекли есте./ Ныне же, Пресвятей Троице предстояще,/ молите о чтущих любовию святую память вашу.

Слава, и ныне, Богородичен:

Не умолчим никогда Владычице,/ силы Твоя глаголати, недостойнии,/ темже и вопием к Тебе, Пречистая:/ моли Сына Твоего и Бога нашего/ со святыми новомученики и исповедники Российскими/ спасти землю Русскую,/ в ней же имя Твое православно величается.

По 2-м стихословии седален, глас 4:

Тяготу трудов и зной страданий понесше, священномученицы,/ семена богопроповедания насадили есте/ и, ралом веры истинныя пажить словесную добре возделавше,/ кровьми мучений оросили есте./ Темже в радость Господа своего внидосте/ и от Него воздаяние трудов восприясте.

Слава, и ныне, Богородичен:

Иже благодарно воспевающии от сердца/ и просящии прилежно Твоея милости, Богородице Владычице, раби Твои зовут и глаголют:/ Пресвятая Дево, предвари и избави от враг видимых и невидимых, и всякаго прещения:/ Ты бо еси наше Заступление.

Величание:

Величаем вас,/ святии новомученицы и исповедницы Орехово-Зуевстии,/ и чтим честная страдания ваша,/ яже за Христа/ претерпели есте.

Псалом избранный:

Бог нам Прибежище и Сила, Помощник в скорбех, обретших ны зело.

Господи, воздвигни силу Твою и прииди, воеже спасти нас.

Глаголах о свидениих Твоих пред цари и не стыдяхся.

Вси языцы обыдоша мя и Именем Господним противляхся им.

Тебе ради умерщвляемся весь день, вменихомся, яко овцы заколения.

Крепость и пение мое Господь и бысть мне во спасение.

По полиелеи седален, глас 1:

Днесь земля Московская лозу плодоносну Богу приносит,/ новомученики и исповедники Орехово-Зуевския,/ верою насажденныя, исповеданием процветшия,/ страданьми плод сотворшия,/ ихже страдания и смерть приемь Господь паче всякаго всеплодия,/ дарует земли нашей мир и велию милость.

Слава, и ныне, Богородичен:

О, Державная Всецарице,/ Ангелов Славо, человеков Покрове,/ мучеников Крепосте, преподобных Надеждо/ и всего мира Всемощная Заступнице,/ избави Церковь Русскую всякаго злаго обстояния,/ Едина Чистая и Благословенная.

Степенна, 1-й антифон 4-го гласа. Прокимен, глас 4: Проидохом сквозе огнь и воду,/ и извел еси ны в покой. Стих: Разжегл ны еси, якоже разжизается сребро. Евангелие от Матфея, зачало 36.

По 50-м псалме стихира, глас 6:

Церкве Русския столпи неодолимии,/ новии Христови исповедницы,/ мученицы Орехово-Зуевстии,/ льстивая увещания и веления безбожная/ мужественне отринули есте,/ сердцем веровавше в правду,/ усты исповедовавше во спасение./ Темже, Царствия Небеснаго достигше,/ молите милостиваго Бога,/ грехов оставление нам даровати/ и спастися душам нашим.

Канон, глас 4.

Песнь 1

Ирмос: Моря чермную пучину/ невлажными стопами/ древний пешешествовав Израиль,/ крестообразныма Моисеовыма рукама/ амаликову силу в пустыни победил есть.

Припев: Дивен Бог во святых Своих, Бог Израилев.

Хвалебныя пения мучеником Твоим приими, Человеколюбче Господи,/ и исправи я, яко кадило пред Тобою,/ да возможем по достоянию прославити новомученики, сродники наша.

Припев: Святии новомученицы и исповедницы Орехово-Зуевстии, молите Бога о нас.

Хвала Богу и жертва священная явился еси граду нашему, священномучениче доблественный Никито!/ Сердца верных просвети,/ ныне память твою совершающих и любовию поющих:/ радуйся, архиерею всечестный,/ житием и подвиги Господа прославивый.

От юности миру распявся, преподобномучениче Иоасафе,/ и душу твою постом и молитвою усовершив,/ во страданиих за Христа непоколебимь явился еси,/ Ему же молися, святе, о почитающих тя любовию.

Богородичен: Яко Заступница Усердная новомучеников и исповедников Российских,/ державным покровом в духовней брани победу им на безбожныя подала еси./ Темже Тя, Пречистая Дево, ныне величаем.

Песнь 3

Ирмос: Веселится о Тебе Церковь Твоя, Христе, зовущи:/ Ты моя крепость, Господи,/ и прибежище, и утверждение.

От лжебратий гоними и мучими, страдальцы Орехово-Зуевстии,/ союзом любве Христовы связуеми,/ всякую злобу вражию попрасте,/ пособие имуще Крест Христов,/ оружие непобедимое и знамение нашего спасения.

Измлада, преподобне Петре, Христа, яко Бисер многоценный, обрел еси/ и, Того Единаго даже до смерти возлюбив,/ лику мучеников сопричислился еси./ Темже, ныне Престолу Божию предстоя,/ моли спастися душам нашим.

От тьмы заблуждения отеческаго к свету Православия преминув, преподобномучениче Серафиме,/ в мире вся красная оставил еси/ и, мудрость духовную стяжав, многия от раскола обратил еси./ Укрепи и нас, святе, во истине право ходити.

Богородичен: О, Всепетая Богородице, Владычице,/ преподобных похвало и мучеников славо,/ ангелы восхваляемая и человеки воспеваемая,/ избави Церковь Русскую от всякаго злаго обстояния,/ Едина Благословенная.

Седален, глас 5:

Потоками свидетельств ложных и огнем мучений/ тщахуся безбожнии шествие ваше, страстотерпцы, ко спасению воспретити,/ обаче посрамишася и низложишася./ Вы же, святии, яко дар, страдания приясте за Христа,/ Иже есть Путь, Истина, Живот и Воскресение.

Слава, и ныне, Богородичен:

Ублажим днесь, вернии, Заступницу нашу,/ Та бо, удел Свой издревле избранный, Русь Православную,/ во испытаниих горьких не остави,/ чад Церкве Христовы во страданиих укрепи/ и во обители Небесныя управи.

Песнь 4

Ирмос: Вознесена Тя видевши Церковь на Кресте,/ Солнце Праведное,/ ста в чине своем,/ достойно взывающи:/ слава силе Твоей, Господи.

На беззаконное судилище влекоми, исповедницы,/ ярости и коварствия безбожных не убоястеся,/ и, яко агнцы посреде волков, Агнца Божия дерзновенно исповедасте/ и ко Владыце Христу мученическим закланием востекосте.

Тверд в мучениих и непреложен во истине пребыв, священномучениче Иоанне,/ пастырь добрый словесным овцам веси Нестеровския явился еси/ и, Христа даже до смерти исповедав, венцем нетленным увенчался еси./ Буди и о нас на Небеси ходатай верен.

Похвало Церкве, священнострадальче Сергие,/ веси Дрезны именитый пастырю и страж неусыпный паствы твоея явился еси,/ ты бо, льсти безбожных не покорився и смиренно муки многия прием,/ темничное уморение претерпел еси./ Моли спастися душам нашим.

Богородичен: Тя, необоримую Стену и спасения Утверждение, Богородице Дево, молим:/ сопротивных советы разори,/ людей Твоих печаль на радость преложи,/ град Твой огради,/ о мире мира моли,/ яко Ты еси, Богородице, Упование наше.

Песнь 5

Ирмос: Ты, Господи мой,/ Свет в мир пришел еси,/ Свет Святый, обращаяй из мрачна неведения/ верою воспевающия Тя.

Новомученицы богомудрии,/ вы, доблим терпением мук и смирением крестным безбожных дерзость посрамивше,/ православных множество в вере утвердили есте./ Темже, в Небесных Кровех пребывающе, молитеся о душах наших.

Возвеличим, вернии, священномученика Николая,/ воздержания рачителя и милости источника,/ иереев похвалу и веры истинныя поборника./ Той бо, единство церковное соблюдая,/ даже до смерти Христа исповеда и мученическим венцем увенчася.

Священства дар и мученичества жребий достойно восприем, священномучениче Василие,/ в горниле огненных испытаний терпением душу твою очистил еси/ и за Христа твердейше пострадал еси./ Темже Погоста Ильинскаго паству и всех поющих тя в вере и благочестии укрепи.

Богородичен: Пресвятая Дево,/ Ты плотию родила еси Христа, Бога нашего,/ Егоже ради святии мученицы, смерть приемше,/ ныне во свете славы радуются./ Темже, Пречистая, и нас, страдания мучеников почитающих,/ Царствия Небеснаго сподоби.

Песнь 6

Ирмос: Возопи, прообразуя погребение тридневное,/ пророк Иона в ките, моляся:/ от тли избави мя, Иисусе, Царю сил.

Яко исчезает дым, исчезоша козни богоборных,/ не могущих одолети крепости вашея, страстотерпцы,/ вы бо, евангельски словесем Владыки Христа последовавше,/ крест свой смиренно на рамена восприясте и незлобием диавола посрамисте.

Егда нощь гонений безбожных наста,/ немощь старости отложив, бодр духом пребыл еси, священномучениче Иоанне,/ и, светильник души твоея огнем веры уяснив,/ мук горьких и смерти не убоялся еси./ Моли, святе, Христа о чтущих любовию память твою.

Почитаем страдания и раны твоя, священномучениче Николае,/ яже за Христа от безбожных претерпел еси,/ темже, славу праведных и воздаяние мучеников улучив,/ пастве Орехово-Зуевстей, яко свеща неугасимая, ныне сияеши.

Богородичен: Пресвятая Мати Дево,/ изведи нас из рова погибели,/ яко древле Господь Иону из чрева китова,/ и уврачуй наша греховныя язвы,/ да неосужденно сподобимся прославляти пречестное и великолепое Имя Сына Твоего и Бога нашего.

Кондак, глас 6:

Светом Истины исполненнии,/ новомученицы Орехово-Зуевстии,/ во дни скорбных испытаний Церкве Русския,/ Крест вземше, последовасте Христу,/ страданьми землю Московскую возделавше,/ радость жизни вечныя/ в Небеснем вертограде ныне пожинаете,/ моляще Человеколюбца Бога,/ мир душам нашим даровати и велию милость.

Икос:

Православия поборницы и добродетелей подвижницы,/ новомученицы Орехово-Зуевстии,/ жребий мученический свыше получивше,/ на враги спасения мужески подвизастеся;/ мук горьких и смерти не убоявшеся,/ силою Христовою безбожных посрамисте/ и верныя во истине утвердисте./ Темже, воздаяния вечная в Раи сладости улучивше,/ непрестанно Господа о нас молите,/ мир душам нашим даровати и велию милость.

Песнь 7

Ирмос: Авраамстии иногда в Вавилоне отроцы/ пещный пламень попраша, песньми взывающе:/отец наших, Боже, благословен еси.

Ангелы и человецы вкупе мужеству вашему удивишася, мученицы,/ како вы, в телеси бреннем страждуще,/ ополчения врагов видимых и невидимых одолели есте./ Темже Победителю смерти и ада вкупе ныне взываете:/ благословен Бог отец наших.

Ликовствуют вернии, сокровище духовное приемлюще, священномученика Александра,/ пастыря добраго веси Пашнево,/ веры поборника и теплаго ходатая спасения нашего,/ свещу молитв неугасимую./ Егоже память ныне совершающе,/ благодарственно Господу взываем:/ благословен Бог отец наших.

Священномучениче Павле, веси Рудневския похвало,/ ты, за Христа страдания горькая и смерть лютую претерпев,/ душу порфирою мученичества украсил еси./ Ныне же Господу, тя прославльшему, взываеши:/ благословен Бог отец наших.

Богородичен: Яже паче ума и словесе Бога рождши, Неискусомужная Марие,/ чтущия Тя от враг видимых и невидимых избави,/ Ты бо еси христиан Держава необоримая.

Песнь 8

Ирмос: Руце распростер Даниил,/ львов зияния в рове затче;/ огненную же силу угасиша,/ добродетелию препоясавшеся,/ благочестия рачители, отроцы, взывающе:/ благословите, вся дела Господня, Господа.

К Небесному наследию, богоблаженнии,/ на крылех страданий возлетели есте/ и тамо, божественному полку новомучеников Российских сочетавшеся,/ Троице Единосущней взываете:/ благословите, вся дела Господня, Господа,/ пойте и превозносите Его во веки.

Вседобле пастырю и мучениче Василие,/ паствы веси Кабановския чадолюбивый наставниче,/ ты, Иову в терпении, Аврааму же в вере подражая,/ за Христа крепчайше пострадал еси, взывая:/ благословите, вся дела Господня, Господа.

Ублажаем и тя, священномучениче Василие,/ веры наставника и благочестия учителя,/ граду Орехово-Зуеву пресвитера всечестнаго,/ ты бо в годину лютую доблестьми страданий твоих просветил еси верных сердца./ Ныне же во свете святых почиваеши, взывая:/ благословите, вся дела Господня, Господа.

Богородичен: Христа зрящи умерщвляема, Многопетая Владычице,/ и, видящи исполнение Симеонова проречения, слезящи, взываше:/ аще и страждеши на Кресте,/ Ты еси Сын и Бог Мой.

Песнь 9

Ирмос: Камень нерукосечный/ от несекомыя горы, Тебе, Дево,/ краеугольный отсечеся,/ Христос, совокупивый разстоящаяся естества./ Тем, веселящеся, Тя, Богородице, величаем.

Престолу славы ныне предстояще и небеснаго блаженства наслаждающеся,/ не забудите земнаго отечества вашего, святии мученицы, о чадех ваших промышляюще./ Молите сохранитися нам от всякаго злаго обстояния/ и в вере Православней утвердитися.

Священномучениче Василие, пастырю веси Красновския,/ тя ни гонения смятоша, ни горькия работы изнуриша,/ на камени бо веры утвердился еси./ Темже, яко доблий воин Христов, полку боговенчанных мучеников сочетався,/ молишися о спасении душ наших.

Мученик двоицу единонравную по достоянию восхвалим, вернии,/ Сергия – иереев похвалу и страдальцев украшение/ и Димитрия – благочестия ревнителя,/ иже, яко светильницы богосветлии, страданьми за Христа возженнии,/ неугасимо в земли Орехово-Зуевстей сияют/ и память их чтущих духовно озаряют.

Богородичен: Тя, Преславную Божию Матерь,/ Славу Небесных и Упование земных,/ новомученицы и исповедницы Российстии славят непрестанно/ и воспевают, яко Державную Заступницу рода христианскаго.

Светилен:

Кровию мученическою верность Церкви запечатлевше,/ сынове Света явистеся, новомученицы прехвальнии,/ и стезею страданий от тьмы века сего ко Свету Незаходимому востекосте,/ веселяще Ангелов и радующе человеков.

Слава, и ныне, Богородичен:

Стена необоримая и Покров всемощный новомучеником явилася еси, Пресвятая Дево./ Буди и нам во всяком испытании крепкая Помощница.

На хвалитех стихиры, глас 8.

Подобен: О, преславнаго чудесе:

О, велия веры исправления!/ О, пречуднаго страдальцев дерзновения!/ Новомученицы Орехово-Зуевстии,/ дивный плод Церкве Русския,/ страха смерти не убоявшеся,/ души своя за Христа положиша/ и венец правды от Него прияша,/ ихже молитвами, Человеколюбче Господи,/ даруй земли нашей мир и велию милость.

О, преславнаго чудесе!/ О, Божественных дарований!/ Лик страдальцев земли нашея,/ в телеси немощнем страждуще,/ враги бесплотныя победиша,/ служители безбожныя посрамиша,/ веру же Православную добле вознесоша./ Темже молитвами святых Твоих, Христе Боже,/ низпосли нам мир и велию милость.

О, предивнаго Божия милосердия!/ Новых мученик крепкое ополчение/ в Небеснем Граде ныне водворяется/ и воздаяние победное приемлет:/ за узы темничныя – светлый рай,/ за страдания временная – блаженство вечное,/ за смерть лютую – Воскресение./ Тех молитвами, Христе Боже,/ низпосли нам мир и велию милость.

Слава, глас 8:

Яко звезды пресветлыя,/ на тверди церковней воссиясте,/ новомученицы Орехово-Зуевстии,/ вы бо, Истины поборницы явившеся,/ безбожных козни сокрушисте/ и нечестие в земли нашей обличисте./ Темже, дерзновение ко Господу стяжавше,/ о земнем отечестве вашем и людех,/ непрестанныя молитвы возносите,/ да не оскудеет вера Православная,/ в ней же нам утверждение.

И ныне, Богородичен: Подобен: О, преславнаго чудесе:

О, преславнаго чудесе!/ Небесе и земли Царица,/ от святых сродников наших умоляемая,/ до ныне землю Русскую покрывает/ и лика Своего изображении милостивно обогащает./ О, Владычице Державная!/ Не престани и на будущее время/ во утверждение на Руси Православия/ милости и чудеса изливати до века. Аминь.

На Литургии

Блаженны от канона, песни 3-я и 6-я. Прокимен, глас 7: Бог нам Прибежище и Сила. Стих: Помощник в скорбех, обретших ны зело. Апостол к Римляном, зачало 99 (гл. 8, 31-39) Евангелие от Луки, зачало 105-106. Конец: В терпении вашем стяжите души ваша: (гл. 21,8-19). Причастен: Радуйтеся, праведнии, о Господе, правым подобает похвала:

Молитва

О, святии всехвальнии новомученицы и исповедницы Орехово-Зуевстии! Троицы Единосущныя поборницы, веры Православныя хранителие! Вы, в лето скорбных испытаний Церкве Русския живота не пощадивше, ради Владыки Христа многовидныя муки и смерть от безбожных претерпели есте и, яко свидетелие вернии, к Небесному наследию востекли есте, идеже в сонме новомучеников и исповедников Российских Троице Живоначальней предстоите и хвалу с благодарением возносите.

Сего ради в день светлаго торжества вашего, мы, недостойнии, похвалы сия и пения, яко дар любве, вам приносим и со умилением взываем: молите Господа и Спаса нашего Иисуса Христа Церковь Русскую неодолиму сохранити, мир Отечеству нашему подати, град сей и вся люди в Православии утвердити и грехов оставление нам даровати.

О, святии ходатаи и небеснии покровителие наши, приимите нас под кров водительства вашего, утвердите немощныя стопы наша к деланию заповедей Божиих и хранении святых уставов Православныя веры, да, во благочестии, покаянии и братолюбии поживше, десную часть спасаемых обрящем, идеже вкупе со всеми святыми сподобимся славити и воспевати всесвятое Имя Отца и Сына и Святаго Духа. Аминь.